Archive for the Keunst category

Se ha har deljûn op it strân
of steane foar in better sicht,
benijd nei fan de striid de stân,
it skip is swier, it waar is licht.

It lichte boatsje fan de bern
moast daliks fan it wetter ôf,
sy kinne nei de wedstriid sjen,
mar skuorre leaver oan in tou.

De hear en dame, heech fan stân,
ha de regatta wol besjoen,
de fiskers binne wer op ’t strân,
de dei lûkt stadich nei de jûn.

It lichte boatsje fan de bern
hat no de kâns om mei te dwaan,
op ’t strân sit inkeld mem as fan
om nei de striid in tút te jaan.

* Claude Monet (1840-1926)
Skilderij ‘De regatta by Sainte-Adresse’
Skilderij ‘It strân fan Sainte-Adresse’

Yn ’t ûnderierdske hat se lein
as mummy yn in djippe sliep
al fan de âldste tiden ôf,
se gong doe troch as kreaze frou
fan farao, in nuveraardich type
fan gjin begjin en ek gjin ein.

Se hie in kistke fan de wei
fan hjir en dêr, fan no en doe,
fan beide hong de takomst ôf,
sa sei it libben fan de frou
of wie ’t de dea dy’t ek wat sizze woe?
Ynienen kaam de ommeswaai.

Fan dêr nei hjir, fan doe nei no,
it krúspunt spriek fan hjoed de dei…
set elkenien it masker ôf?
De fraach kaam fan de wize frou,
dy’t wis wie fan: dit is de wei,
wat iepen leit, wit fan gjin ho.

* Skilderij ‘Crossroads’