Archive for the Keunst category

Draafd en plûnze en noch swommen,
letter boud in sânkastiel,
en doe’t er kriich in droege kiel,
hat fluch de floed syn bouwurk romme.

Hearlik neaken lit er komme
’t wetter op syn waarme fel
en jout him yn syn dreamwrâld del:
de ridder komt op ’t lûd fan trommen.

Wurk en wurk en wurk, itselde
ritme dei op dei op dei,
in steapel dy’t sy stadich lei
en dêr’t sy amper oer fertelde.

Nei it wurk, net yn de winter,
want dan is de stien te kâld,
begjint sy mei har eigen wrâld,
net swierder as in lichte flinter.

* Mariano Fortuny y Carbó (1838-1874)
Skilderij ‘Neaken op it strân by Portici’

** Juan Manuel Blanes (1830-1901)
Skilderij ‘Lânskip yn Paraná’

De fierte seach er troch it rút,
trochskinend fan syn lange siken,
ynspiraasje foar en nei,
syn keunstwurk ta beslút.

By ljochtskyndei de Wâldsterwei,
dy’t trochrûn nei de kleare fierte,
’t polderlânskip wie syn see
en weagjend dreau er mei.

Mar as de dize fan de jûn
oer wei en feart en greppels ware,
wied er wer op ’t eigen stee:
beheind, dochs byldzjend sûn.

* Jan Mankes (1889-1920)
skildere syn lytse wrâld
yn in hiel persoanlike styl.
Skilderij ‘Wâldsterwei yn jûnsskimer’