Archive for the Keunst category

Sa’t se foar ’t posearjen binne,
leaf en bylkjend yn de moaiste dracht,
stiet elk model foar heit syn rintejacht
om status oan te winnen.

Komme sy net sa’t se binne?
Yn har fodden om’t se oars net ha,
gean fjouwer bidlers op ‘e sinten ta
sa’t sy allinnich kinne.

Wêr’t ús berntsjes neat fan witte,
op ‘e rêch of as in jachtmodel,
yn ’t eigen wrâldsje binne sy yn tel,
yn wearde net te mjitten.

* Rembrandt (1606-1669)
Skilderij ‘Famyljeportret’
Skilderij ‘Bidlers oan de doar’

Men sil deselde hobby ha,
each foar detail en op it doek,
’t giet wol op fariaasje ta,
de ien it skiep, de oar de snoek.

Hy sit te kueren nei it fee
dat leit te slomjen op it gers,
it iennichst selskip op dit stee,
it hâldt him wekker, by de les.

Fan ’t wetter waaie lûden oan,
in heech jûchhei, mar wêrfoar dat?
Syn hobby is foar hjoed bedoarn,
it fee lûkt fan it gers it gat.

Gjin snoek sit oan de hoek, in foarn,
’t posearjen duorret hjir mar koart,
de sketser lûkt de streken skoan
ta foarn, mar inkeld yn it swart.

Men sil deselde hobby ha,
de ien set mei mislearre fee
op hûs en atelier wer ta,
de oar is mei ien haal al ree.

* Hendrikus van de Sande Bakhuyzen (1795-1860)
Skilderij ‘Selsportret yn in lânskip’

** Huib van Hove (1814-1864)
Skilderij ‘In fiskpartij’