Archive for the Keunst category

Gjin mins bleau yn de hûs,
de waskfrou liet de tobbe stean,
de bakker smiet de bôle del,
de graver stapte út it grêf,
de berntsjes seachst út skoalle gean,
de swarte krieën skrasten skel,
mynhear pastoar stiek op syn stêf…
elk seach en harke nei de rûs.

It wie elk oan te sjen,
de nekke dy’t de holle droech,
de noastergatten withoeheech,
de eagen mei in frjemde glâns,
gjin mins wie wurch of sleau of slûch,
wol dwyl, dit sicht foel harren dreech,
se rekken suver út balâns
as gie it doarp hjoed noch ferlern.

Mar mynhear pastoar liet witte:
‘It is ’t merakel fan Marije,
sy mei ús doarp wol lije.’

* Roméo Dumoulin (1883-1944)
wie in Belgyske skilder en litograaf,
dy’t in eigen printerij yn Brussel hie
Skilderij ‘Yn de loftballon’

Heech hie hy it yn de bol,
naam syn hoed mar selden ôf,
libbe yn it ûnbewuste,
blyn foar boppe as in mol,
seach de wrâld as yn in kou,
fielde him it aldergrutste.

Sjedêr, in do fleach foar him lâns,
in wite flits, syn lêste kâns.

De hoed kaam ôf, in glêde bol,
in spegel foar it himelsblau,
ûneinich ’t aldergrutste,
de kosmos waard fan stjerren fol,
bleau oan de earste skepping trou,
dy’t tocht wie de Bewuste.

* René Margritte (1898-1967)
Skilderij ‘Man mei bolhoed’
Skilderij ‘De takomst fan de stânbylden’