Archive for the Keunst category

Wylst sy de turven hastich loeget,
kroadet hy de lêsten oer it paad
de planke op, sa nei de boppelêst
en derby del, ’t giet sûnder praat,
want beide bodzje… daliks rêst.

Wylst tweintich poaten steane, slûget
hy, syn wachtsjen hat gjin fêste doer
en boppedat, de sit foldocht him bêst,
mar fart de skûte, dan is ’t oer,
syn jagersrop ferbrekt de rêst.

* Vincent van Gogh (1853-1890)
Skilderij ‘Turfskûte mei twa figueren’

** Anton Mauve (1838-1888)
Skilderij ‘Fjouwer jaachhynders’

Heit seit: ‘Wurd gjin hûn
dy’t harket nei syn baas,
mar lês hjoed wurd nei wurd,
dy foarmje sa in sin,
fan lyts oant grut hat nut
en wit, de ierde draait yn ’t rûn.’

Hy tinkt: lit se mar
en set de fear rjochtop,
slacht beide boeken ticht,
omdat er ’t sels wol kin:
de eigen top jout sicht
op yn it rûn, dit is syn kar.

* Jean-Baptiste Siméon Chardin (1699-1779)
Skilderij ‘Jonge mei top’