Archive for the Keunst category

Sjedêr de trije mei ferskil
yn aksje en mei konsintraasje
harkjend, want se ha in eigen wil,
ek rjochte op ferdivedaasje.

Se giene troch foar unifoarm,
mar binnen stie soms ien derbûten,
sy foldie net oan de fammenoarm,
it narjen wie foar har in boete.

It lêzen fan in treastferhaal
brocht stilte nei de stoarm fan binnen,
sy ferskilde troch in eigen taal
dy’t krong troch weeshûsmuorren hinne.

* Thérèse Schwartze (1851-1918)
Skilderij ‘Trije boargerweeshûsfamkes fan Amsterdam’

** Nicolaas van der Waay (1855-1936)
Skilderij ‘Amsterdamsk weesfamke’

De flaggen jouwe oan
in feestlik barren op it wiet
dat foar de naasje oansjen biedt,
mar ek foar har… in witenien.

Wêr giet it hjoed op ta
mei wolken reek yn plak fan ’t seil,
sy sjocht dêryn gjin inkeld heil,
yn plak fan wyt sa griis as stien.

In kuier mei har soan
en útlis oer wat bloeiend is
en bliuwend, foar it minskdom wis,
fansels past hjir in grienenien.

‘Sjoch nei de wolken, wyt
yn plak fan griis, gjin reek dy’t driuwt,
it is it sinneljocht dat bliuwt,
dus dêrom dizze parasol.

* Claude Monet (1840-1926)
Skilderij ‘Strânterras fan Sainte-Adresse’
Skilderij ‘De kuier. Frou mei parasol’