Archive for the Keunst category

Hy kaam yn ’t pak yn ’t atelier,
wist net wat de bedoeling wie,
dochs klaaide hy him út,
omdat de skilder nedich hie
in bleat model foar ’t iepen rút.

Hy moast posearje mei in fee
yn stjerrejurk foar syn geslacht,
mar ’t wie in frjemd kontrast:
hy hold har fêst, sloech ’t wiif gjin acht,
de grize kop hie mannich barst.

De keunst lit klear it libben sjen
sa tusken bleat en mearke yn,
in nuver aventoer;
de dea skinkt inkeld kleare wyn
en achter ’t rút bloeit de natoer.

* Léon Frédéric (1856-1949)
Skilderij ‘Atelier’

Ik rook en sûch de wangen hol,
blaas dan de reek wer út ‘e snút,
de pipe is myn ien en al,
sels noch as ik de eagen slút.

Ik drink en rook faak tagelyk,
de drank deryn, de reek derút,
it lykwicht hâld ik oant myn lyk
krijt fan it wiif de lêste tút.

* Adriaen Brouwer (1605/1606-1638)
Skilderij ‘De roker’
Skilderij ‘De drinker’