Archive for the Keunst category

Sy wie in iere bystânsmem,
betiid al út ‘e fodden wei
foar ’t hoedzjen fan de beide bern
en ’t noedzjen troch de dei.

De bystân kriich sy fan de frou
dy’t har it alderneiste wie
en daliks seach: sy eaget grau
en swier sa’t sy dêr stiet.

Nei njoggen moannen wie it tiid
foar ’t libben fan it tredde bern,
it stûke, gie net sûnder striid,
ien libben wie ferlern.

Sy hoegde doe gjin bystân mear,
it noedzjen wie foargoed foarby,
de buorfrou stie foar trije klear,
har lampe skynde by.

* Charles Rochussen (1814-1894)
Sepiatekening ‘Geerte bringt in besite
oan har deade buorfrou’
(Sêne út ‘Arme Visschers’)

Triomf, hy hat syn slach wer slein,
de Frânsman leit folslein derûnder,
hy is noch lang net oan de ein,
fart ûnder seil foar wûnder.

Sjedêr, as nij de helling ôf,
de grutste, grutsk is de marine,
de Frânsman komt troch him yn ’t nau,
hy lit syn fjurren skine.

Nei fjirtich jier de seilen del,
de boech slacht net mear troch de weagen,
gjin Frânsman wurdt fan him noch kjel,
hy hat de dea foar eagen.

De himel jout de symbolyk,
de stoom fertelt fan nije tiden,
moarn is de Temeraire lyk,
hat neat as stof te bieden.

* Andrew Kennedy
Skilderij ‘De Temeraire fart by Trafalgar wei’

** William Turner (1775-1851)
Skilderij ‘It oarlochsskip Temeraire wurdt nei de sloop sleept’