december 15, 2016
fan Peter Paul Rubens*
Reboelje yn de heechste himel
mei krityk op God syn troan,
fan ingels út op alle macht,
de Almacht seach it earst mar oan.
Mar doe’t de boel út lykwicht rekke,
’t Godsryk hie wat fan de hel,
sloech Hy op ’e reboelje acht,
kriich Michael it striidbefel.
Mei ’t reade kleed los om de skouders,
wjukke hy op ’t slachfjild ôf,
sloech ta mei ’t swurd út alle macht
en brocht de duvels yn it nau.
Lit Michael hjoed ek mar komme,
want de striid is lang net oer,
diktators hearskje dei en nacht
en bouwe troch oan Babels toer.
Flean del, do ingel, út ’e himel,
stjit de duvels fan de troan,
dy’t bern fermoardzje, want soks slacht
op helske opstân tsjin Gods Soan.
* Peter Paul Rubens (1577-1640)
Skilderij ‘De aartsingel Michael
ferslacht de opstannige ingels’
december 8, 2016
fan William Turner*
Sjedêr wat oerbleaun is
fan sultan Tippoo’s poarte,
yn Britsk Ynje wiid ferneamd,
it giet úteinlik mis
as fûl it bloed fan blanken streamt.
Gjin wetter hâldt it tsjin,
it weaget oer de baren,
krûpt wêr’t it net komme mei,
is út op frjemd gewin
en giet kanonreek achternei.
De skotten klinke fier
en sjonge fan de sege
heech en leech: ‘God save the queen!’
Mei tûzen man yn ’t spier
is ’t by de poarte al gau dien.
Fuort mei it frjemde bloed,
it Britske wol it weagje
mei geweld: ‘It rûles the waves!’
Is Tippoo’s folk yn noed?
Wat oerbliuwt, krije se fergees.
* William Turner (1775-1851)
Untwerp foar it skilderij
‘De poarte as ferbliuw fan Tippoo’