Archive for the Keunst category

Sjoch him net as katolyk,
yn ’t algemiene sjocht er neat,
hy stiet foar God en syn gelyk
en al it oare is ferkeard.

Mei syn skjinne, rûne kraach
heint hy de wiere wurden op,
allergysk foar krityk of fraach,
hy stiet foar God en syn gebod.

Mei syn hannen hâldt er fêst
oan ’t bibel- en it eigen wurd,
hy sit der mei syn preek nea nêst,
ferbynt de geast mei earnst en nut.

Sjoch har antlit mei in glim
no’t sy it Wurd sels lêze kin,
fan Babel oant Jeruzalem,
sa krijt it algemiene sin.

* Jan Anthonisz. Van Ravesteyn (1570-1657)
Skilderij ‘Portret fan in dûmny’

** Pieter Verelst (sirka 1618-nei 1668)
Skilderij ‘Portret fan in âlde frou mei Bibel’

De iene giet by alle doarren lâns,
de rottekrûdferkeaper:
‘Bêste man, it is bêst spul, jo kâns
foar rotten op in steapel.

Se hingje by my oan in hege koer,
ik ha ien op it skouder,
’t spul is net as rottekrûd sa djoer
foar steapels op ‘e souder.’

De oare stiet skodholjend yn de doar
en wol der neat fan witte:
‘Nee, jo ha gjin steapelgekke foar
om gif oer ’t fleis te jitten.

Dêr leit in baarch, oan fjouwer poaten bûn,
sa kalm op my te wachtsjen.
Rottefleis as bargefleis, sa sûn?
Wolnee, jûn sil ‘k him slachtsje.’

* Rembrandt (1606-1669)
Ets ‘De rottekrûdferkeaper’
Ets ‘De baarch’