Archive for the Keunst category

Fier oer de midden fan de dei,
te hastich, mei in holle mage,
drafke sy nei skiere kimen,
naam it skip foar eagen mei,
dat laden wie mei fjirtjin fragen.

Sy wie te ier op ’t hege dún
en frij fan wat yn ’t wurk te dragen
foel, mar net wat yn har weage;
foar har eagen wie it brún
en laden mei wol hûndert fragen.

De lêste strielen skeaten fjoer
doe’t donkerbrún it skip opdage
mei de heit fan al dy fragen;
syn beskie joech grif wer stjoer
foar withoefolle drege dagen.

* Jozef Israëls (1824-1911)
Skilderij ‘Faam op in dún’

** Hendrik Willem Mesdag (1853-1894)
Skilderij ‘Foar de Hollânske kust lâns’

Yn Ruslân of yn Oekraïne,
it is de keunstner dy’t it wit,
mar dy’t it net mear witte lit,
de sinne lit syn ljocht wol skine.

Se rinne sjongend by ’t lemieren
de fjilden foar de risping yn
of stil… dat wit de soele wyn,
gefoel taast hjoed de dei nei ’t wiere.

Of komme se werom en rinne
se sjongend oer it diene wurk
op hûs oan, stimt ek mei de ljurk,
it antwurd komt net fan de sinne.

Wol harkje nei in wier ferline
doe’t honger ware troch dit gea,
miljoenen rûnen mei de dea
foar eagen sûnder wat te finen.

Yn Ruslân of yn Oekraïne,
de froulju sjonge ’t selde liet
lykas dat yn in krisis giet,
oer beide skynt deselde sinne.

* Andrej Andreevitsj Mylnikov (1919-2012)
Skilderij ‘Op ‘e fredige fjilden’