Archive for the Keunst category

It resultaat stie muorrefêst,
hoewol’t de holle wie him dwyl
fan lang foaroer, de lea ferlamme;
it lichem frege om wat yl
wie, want nei swierte joech soks rêst.

De kroech wie jûns it ûnderdak
foar swiere rokers, pipen fol,
want idel wie ’t bestean, ferjamme!
Mei fjoer en reek joech ’t libben gol
gerak oan elk, dit wie syn plak.

* David Teniers de Jonge (1610-1690)
Skilderij ‘De smokende mitseler’

Ik wie ferbline troch de pracht
fan ljochte jurken yn de ploai,
ik sil it wol bekenne,
’t hie my danich yn de macht,
ik gie mei harren oan de roai
en soe dêr side mei bespinne.

‘k Stie iepen foar it sidich praat,
beskôge dat as hiel foarnaam,
ik sil it wol bekenne,
’t netwurk lei yn harren aard,
de mûle brûkten se as kaam
om kreas te kjimmen en te winnen.

Dat duorre oant dy frjemde moarn,
doe’t by de haven hy dêr lei
om alles te bekennen,
komst fan de ferlerne soan
yn fodden, ‘k hearde wat er sei:
‘Ik koe net oars as nei heit rinne.’

* James Tissot (1836-1885)
Skilderij ‘De resepsje’
Skilderij ‘De ferlerne soan yn moderne tiid’