maart 22, 2018
fan Peter J. Sterkenburg*
As útropteken op ’e hichte
stie de toer yn waar en wyn,
syn skynsel skeat de fierte yn,
oan skip en folk ferplichte.
De trijemêster op ’e weagen
brûsde stjoerleas nei de toer,
it skipsfolk seach de brâning oer
en kriich de ramp foar eagen.
De seilen sloegen út ’e liken,
skuorden mei de ra en mêst,
it anker socht noch om hâldfêst,
mar fûn it net die bliken.
It skipsfolk kaam yn see telâne,
preau fan sâlt en drinkeldea,
it needlot raasde oer it gea:
‘In trijemêster strânet!’
* Peter J. Sterkenburg (1955-2000)
Skilderij ‘Skip yn need’
maart 15, 2018
fan Johan Klombeck*
In hynder en in hûn,
mear dieren binne net te sjen
fanwege fûle kjeld,
mar sjoch… wat hat de winter jûn,
foaral oan al dy bern,
gjin âlder dy’t dan telt.
Om’t ljocht fan tsjuster wûn,
giet neat oan ’t wintersicht ferlern.
In keppel skiep en kij,
de dieren kin men amper sjen
troch ’t fallen fan de jûn,
de bosk skoot stadichoan foarby,
de fierte giet ferlern,
de hoeder ropt de hûn.
It docht him net mear nij,
dit is wat hy al jierren ken.
* Johan Klombeck (1815-1893)
Skilderij ‘Winterlânskip en hynder’
Skilderij ‘Simmerlânskip mei fee en hoeder’