juli 19, 2018
fan James Ensor*
Sa, ja… dit bin ik,
nee, ’t is gjin selsportret,
ik sit hjir, bin ek op it doek,
ha fierder gjin ferlet
fan kommentaar.
’k Meitsje my net dik
oer wat it folk wol seit
of wat is yn de keunst gebrûk-
lik, hoe’t it fierder leit?
Gjin kommentaar!
’t Giet my om de kick,
’t idee en bin ik klear,
dan stiet myn wêzen op it doek…
wat fierder? Om de ear?
Gjin kommentaar!
* James Ensor (1860-1949)
Skilderij ‘Ensor foar syn skildersezel’
juli 12, 2018
fan Claude Joseph Vernet*
Myn God, ha sy dit no fertsjinne?
Har skip is op ’e rotsen slein
en is yn stikken brutsen…
is it har fertsjinne lean?
Sy gûlt, de hannen oan de holle
yn wanhoop om de neare ein
fan ’t skip en wa’t noch lutsen
binne, manlju sûnder klean.
Myn God, hoe soe dit fierder rinne
mei wa’t sels net mear rinne kin?
Straf net fanwege sûnden…
Heare God, wer ien yn need!
Sy gûlt, it wurdt har fierste folle,
it twadde kin der ek net tsjin
en sil ’t net rêde sûnder
help, want oars slacht ta mear leed.
Godtank, Jo komme mei de sinne
en slaan de wolken útinoar,
’k bin tsjûge fan in wûnder,
dus dat skip sil net fergean.
* Claude Joseph Vernet (1714-1789)
Skilderij ‘De skipbrek’