november 29, 2018
fan William Turner*
Lit de sinne heger klimme,
want de dize hâldt de strielen tsjin
of jout de moarntiid sa de glâns
dy’t djipper is op ’t ierdske flak?
De himel soarget foar gewin.
Hûnderttûzen fisken swimme
noch, de nacht joech lykwols net te min;
de fiskers wiene ’t wekjen mânsk
en brochten krekt de boat teplak,
fersetten no mei drank it sin.
Froulju ha de sliep ôfbrutsen,
foar ’t gefoel wie it noch neare nacht,
’t ferstân brocht harren op it strân
noch foar’t de boaten sylden út
de dize, sulver wie de fracht.
Is it mes yn ’t fiskfleis stutsen,
krijt de sinne oer de dize macht,
dan skoot it seebyld nei it lân
en sprekke fiskers fan de bút…
gjinien slacht noch de himel acht.
* William Turner (1775-1851)
Skilderij ‘Fisk by it lemieren’
november 22, 2018
fan Georgij Georgievitsj Rjazjskij*
In brief, jawis de brief
dy’t sy al lang ferwachte,
mar net komme woe;
sy seach it daliks oan de slúf,
it hânskrift wie bekend, wat stiif,
it waard har dochs te machtich.
Mem woe it earst net ha,
mar heit seach yn de fierte,
krekt as ’t komme soe
út Moskou wei, in fêst beslút;
úteinlik mocht se dêrnei ta,
it gie om mear te witten…
… as wrotters op it lân,
nee, ’t hat har noch net spiten
dat it oangean koe,
dochs seach se nei in skriuwen út,
’t gefoel dat kaam út mem har hân
en spriek fan harren krite.
* Georgij Georgievitsj Rjazjskij (1895-1952)
Skilderij ‘Brief’