oktober 11, 2018
fan Samuel Jakolevitsj Adlivankin*
Se stean model foar elk gelyk
yn ’t blau, de eachopslach omheech;
de takomst fan de Sovjet-Uny
tsjinnet wrâldwiid fan replyk…
… de jeugd dy’t noch net bouwe kin
modellen foar in nije tiid:
de ienheid ûnder stielen wjukken,
wat oan ’t fleanen is te sjen.
Se draaie de propellers rûn,
want rûnom flammet op de striid
om yn it westen troch te drukken,
Stalin hat it sein al jûn.
Mei beide fuotten op ’t beton
en ’t each op hoe’t it fierder giet,
sweeft elk gelyk nei ’t wiffe westen…
har bestimming is spion.
* Samuel Jakolevitsj Adlivankin (1897-1966)
Skilderij ‘De wedstriid fan jonge modelbouwers’
oktober 4, 2018
fan James Ensor*
De manlju oan de muorre skreauwe
mei de dolk en feger út ’e list:
stek en slaan him stjerrend…dea!
De bisten yn de hoeke gûle:
wa’t de slach of stek no mist,
dy spuit en spuitet bloed,
giet nei it likegea.
De manlju dy’t yn fjochtsjen leauwe,
knipe, klauwe, hymje, gjin gesicht
hoe’t de eagen flitse as
de wjerljocht foar de tongerklappen
op ’e noas, dy rekket ticht
en spuitet strielen bloed,
’t streamt oer de reade jas.
Twa fjochtsje dan noch om de iene,
spuitsje elk de reade noch wat yn
foar it libben of de dea;
’t is stjerrend wier, de bisten gûle,
nee, it is op ’t hôf de wyn:
de reade leit foargoed
as lyk yn ’t swarte gea.
* James Ensor (1860-1949)
Skilderij ‘It gefjocht’
Tekening ‘Dea en dokter by in grêf’