december 27, 2018
fan Johan Muyle*
Noch stiet er stil, op ’t busstasjon
hâldt hy de siken yn,
benijd nei noch in passazjier,
in kammeraat út Lissabon
of fierder fuort út Lima,
tichterby faaks, út Berlyn?
Wa’t sit, sjocht net nei de sjauffeur,
mar út nei wa’t noch komt,
safolste keunstner fan it jier;
mienskiplik jouwe sy de kleur
oan wat op ierde libbet,
sels gjin swarte is ferdomd.
It duorret wol in ivichheid,
want keunstners komme faak
te let, mar har ûnthjit rikt fier:
in wûnder, oars as inkeld feit,
de geast rydt sels nei Lima
ta, in keunstwurk yn de maak.
* Johan Muyle (1956-…)
Skildering ‘I promise you in miracle’ (detail)
By it busstasjon ûnder it Noardstasjon
te Brussel: 1600 m2 akryl op beton
december 25, 2018
fan Peter Paul Rubens*
Jawis, hy brânt, ik fiel it oan,
noch efkes wachtsje, jonge,
net te fluch fan tsjuster nei it ljocht,
hjit kearsfet is gefaarlik,
sstt, byt earst mar op ’e tonge.
Nee beppe, ’k hâld my sa wol stil,
myn kearske moat ek brâne,
want dat jout mear ljocht as beppe sjocht,
ik fyn it kin wol dalik,
’t fet komt dêr net op telâne.
Sjesa, myn hân kin der foarwei,
it is in wûnder, jonge,
fan it tsjuster komt it yn it ljocht…
hoe komt it mei dyn flamke?
Wolst wol leauwe, ’k kin wol sjonge.
Sstt, beppes tonge krijt gjin byt,
dan kin ik ek wol sjonge.
* Peter Paul Rubens (1577-1640)
Skilderij ‘Alde frou en jonge mei kearsen’