Archive for the Bibelbylden category

Profeet bin ik, mar moedeleas,
in leech gefoel fan nei de plôk
as beam of strúk gjin frucht mear hat;
de kiel waard my fan ’t praten heas,
mar gjin beweging, mei gjin stôk.

Bewege mei de fuotten wol,
se sitte achter oaren oan;
en mei de hannen foar smoarch jild,
se ha de mûle derfan fol
en blaze fan har hege troan.

Fertrouwe kinst gjin minske mear,
gjin buorman, sels gjin bêste maat,
de soan ferachtet djip syn heit,
tsjin mem spant slim de dochter gear,
yn ’t eigen hûs bloeit op de haat.

Profeet bin ik, net sûnder moed,
mei hease kiel brocht ik it wurd
dat fan de Iene tsjûge hat;
Hy hellet my wol út ‘e noed,
syn namme wurdt yn ’t lân wer grut.

* James Tissot (1836-1902)
Yllustraasje ‘Profeet Micha’

Ik hear jim falske útspraak,
profeten fan de keale grûn,
salang’t de tosken bite kinne,
sizze jim de frede oan,
mar is der neat te winnen,
dan ha se it by jim bedoarn.

Jim stelle oarmans wurden
as hie de stêd de frede wûn
en soene folken Sion achtsje,
komme nei de hichte ta
om dêr op heil te wachtsjen…
jim lige, want dat is net sa.

Ik, Micha, ha in útspraak
oer dochter Sion op ‘e grûn
fan Babel, swier fan bern en lijen,
ik sis oars de frede oan:
de Hear sil har befrije,
de wierheid hat in kleare toan.

* Gustave Doré (1833-1883)
Yllustraasje ‘Micha kundiget
Jeruzalem it oardiel oan’