december 3, 2016
fan Gustave Doré*
Ut Gileäd kaam it berjocht
dat Joaden rûnen grut gefaar:
de dea en oars in slavelibben;
Judas hat dêr oars oer tocht
en nei befrijing stribbe.
Syn leger teach troch de woestyn,
wie doe al wiet fan de Jordaan
en koe it yn de hjitte rêde:
’t naam ferskate stêden yn
en hat de bloei fertrêde.
Timotéüs, de generaal
fan ’t heidensk leger, wie te let
by ’t wetter streamend oer de stiennen;
Judas’ leger sloech totaal
troch alle wjerstân hinne.
De Joaden, út ’e hjitte wei,
naam Judas mei oer de Jordaan,
in oergong troch it koele wetter,
’t fielde as in ommeswaai,
yn Sion koe ’t net better.
* Gustave Doré (1833-1883)
Yllustraasje ‘Judas ferslacht Timotéüs’
november 26, 2016
fan Armand Boni*
De rop rûn troch it hiele lân
dat Judas fierde ’t leger oan,
it gie fan heit op tredde soan,
hy hie it swurd fêst yn de hân.
It swurd fan Apoloanius,
dy’t hy fersloech yn fûle striid,
syn rom rûn troch, waard wiid en siid
bekend, it slagge Judas dus.
Hy sloech mei ’t swurd it leger del
fan Searon, Gorgias en ek
stie Lysias op ’t fjild foar gek,
in liet hat doe syn lof ferteld:
Judas eage yn syn harnas grut,
lykas in reus liet hy him sjen
mei yn de hân in spear en swurd,
sa teach er moedich nei ’t gefjocht,
hy âle, sprong, in jonge liuw gelyk,
syn proai hie ’t libben rap ferlern,
syn fijân, deabenaud, oerstjoer,
socht krûpend om in goed ûntwyk,
de goddeleazen misten elke kâns,
want hy kaam op foar wet en rjocht,
it ûnrjocht fan de kening wie him oer,
as held wie Judas hiel wat mâns.
* Armand Boni
Boek ‘Judas de Makkabeeër’