Archive for the Bibelbylden category

De ferwûndering fan Jakobus

fan ûnbekend*

Wy wiene mei ús trijen,
seagen op ’e berch ek trije stean,
’t wie frjemd, ik kin der noch net by,
it wiene Jezus, Mozes en Elia
yn ljochtsjend wite klean;
myn broer Jehannes frege my:
‘Wêr giet dit eins op ta?’
Ik koe it ek net helder krije.

Wy sieten earst te slomjen,
Jezus lei op knibbels yn gebed
lykas er op ’e berch wol faker die,
gjinien wist doe fan Mozes en Elia,
’t wie ûndertusken let
genôch foar noch in goede rie,
wy moasten iten ha,
dat soe grif ek ús geast ferromje.

Ik koe it amper leauwe,
want ynienen like ’t ljochtskyndei
en Jezus wie yn drok petear,
no wit ik it, mei Mozes en Elia,
’t wie Petrus dy’t wat sei
oer tinten bouwe en soks mear,
mar Jezus woe ’t net ha…
doe seach ik dat der wolken dreauwen.

* Ikoan ‘De ferhearliking op ’e berch’

Petrus as Kristus-sizzer

fan ûnbekend*

Folslein bin ik no yn betizing
om wa’t ik einliks bin,
in Kristus-sizzer of de satan?
De iene goed, de oare min…
is dat syn ûnderwizing?

De fraach fan Jezus fûn ’k al nuver:
‘Wat seit it folk oer my?’
Ik koe der earst gjin fet op krije,
soks giet folslein oan my foarby…
is sa’n petear wol suver?

Doe kaam de fraach: ‘Wat sizze jimme?’
Dêr wie ik gau mei klear:
‘Ik sis dat jo de Kristus binne!’
Fan my kriich Jezus alle ear,
mar klonken der mear stimmen?

De stim fan Jezus klonk allinnich,
dat hy slim lije moast,
úteinlik soe hy dêroan stjerre,
mar dêrfan leaude ik gjin barst
en sei, it wie ûnsinnich.

Ik moast myn sizzen slim belije,
waard mei syn wurden slein:
‘Gean daliks foar my wei, do satan!’
Dat waard my as dissipel sein…
moat ik no Jezus mije?

Ofbylding ‘Petrus’