februari 10, 2018
fan ûnbekend*
As hegepryster fan de Hege Rie
ha ik wol wat te sizzen,
sels ûnder de Romeinen,
mar it wurd wurdt folge troch de die,
it sil net oan myn ynbring lizze.
De tiding oer in man út Nazaret
hat minsken sprekke litten:
‘In deade waard wer libben!’
Soks giet yn tsjin ús ferstân en wet,
mar ’t folk sil dat net gau ferjitte.
De spanning yn Jeruzalem nimt ta:
in protte folk op strjitte
lit him yn ’t sok meislepe,
mar soks kinne wy as Rie net ha,
elk moat syn komst ús witte litte.
As hegepryster ha ik juster sein:
‘Lit him foar ’t folk mar stjerre,
dat is foar alles better!’
Stjerrend wier, de dea wurdt net ferslein
troch him, lit dat rûnom mar hearre.
* Yllustraasje ‘Hegepryster Kajafas’
februari 3, 2018
fan Caravaggio*
It lêste wat ik doe noch hearde:
‘Lit ús Jezus boade dwaan,
oars komt it grif net goed.’
Myn susters koene it net rêde,
hoe soe ’t oars, ik wie te siik,
dus sieten se yn noed.
Hoe soe ik fan mysels mear witte?
Dea wie ik, in grut swart gat,
ferslach kin ik net jaan.
Myn susters ha der wol mei sitten,
earder draafd, want ik wie dea,
ik hie dêrfan gjin aan.
It earste wat ik doe wer hearde:
‘Lazarus, kom no derút!’
Dat wurd kaam op ’e hûd.
’k Moat sizze, Jezus hat it rêden,
freegje my net nei it hoe,
twa wurden noch: hy woe ’t.
* Caravaggio (1571-1610)
Skilderij ‘De ferrizenis fan Lazarus’