maart 2, 2019
fan ûnbekend*
Ik hie him oansjoen foar in terrorist,
de lieder fan wol fjouwertûzen
striders út Egypte wei,
mar sels in kolonel út Rome mist
somtiids krusjale ynformaasje.
It skeelde neat of ’t mantsje hie der west,
sa neatich wie er tusken tûzen
Joaden, dy’t yn ’t wylde wei
him sloegen, want sa hiene se de pest
oan him; de opskuor rôp om faasje.
Myn mannen ha it mantsje rap ûntset
en moasten him sels fierder drage
nei’t er yn de boeien slein
wie, want ik moast my hâlde oan de wet,
mar ’t rûn úteinlik út op graasje.
It wie in Joad, sels boarger fan ús ryk,
dus moast ik yngean op syn fragen,
ha him fan ’t arrest ûntslein;
hy woe in taspraak hâlde, dat fersyk
ha ’k tastien sûnder argewaasje.
* Yllustraasje ‘Paulus hâldt in taspraak yn Jeruzalem’
februari 27, 2019
fan ûnbekend*
Wês wolkom, Paulus, yn Jeruzalem,
wy binne bliid dat jo hjir binne
mei ’t ferslach dat nei jo reis
net-Joaden Jezus ek al kenne.
Wy jouwe God de eare mei ien stim,
want Joaden kamen ek ta ’t leauwe,
dat jo brochten ús goed nijs;
der binne lykwols guon dy’t kreauwe…
… oer jo ferset tsjin de besnijenis,
net-Joaden hawwe dy net nedich,
dêr’t al earder praat oer wie…
is jo belied wol evenredich?
Wês dêrom, Paulus, wiis: der is neat mis
as jo jo goede wil sjen litte,
wat úteinlik is ús rie…
wy moatte beide kanten mjitte.
Ikoan ‘Jakobus’