mei 4, 2019
fan ûnbekend*
Jim binne bruorren fan elkoar
yn ’t leauwe oan de iene Hear,
dus jou Him alle eare,
mar gjin broer is oan de oar gelyk,
jim hoege net oer oaren gear.
De iene yt wat er mar wol,
de oare griente en net mear,
se dogge ’t Him ta eare,
tink net by dysels: ik ha gelyk,
dus bin ik better foar de Hear.
Wês foar dyn broer gjin stroffelstien
troch watsto ytst, want dan dochst kwea,
doch goed, dan stiest yn eare
by de minsken; inerlik bist ryk
as leauwe is dyn deistich brea.
Brief fan in Joadsk-Romeinske frou oan Paulus
Bêste Paulus, hoe ha wy it no!
Do hast it hieltyd oer myn broer,
bin ik dan net yn eare?
Ik as frou bin inerlik ek ryk,
dyn manlik skriuwen slaan ik oer.
Yllustraasje ‘Joadske frou’
mei 1, 2019
fan Historia*
Wat is ûnder, wat is boppe?
Wy steane ûnder it gesach,
want oer ús stiet altyd de oerheid,
dy’t troch God roppen is,
dus sil gjinien nei boppen skoppe.
Elkenien krijt in gewisse,
dat ynfloed hat op it gedrach,
wa’t goed docht, hoecht net bang te wêzen,
de oerheid sil dan wis
dy priizje, wat ferkearden misse.
Wa’t ferkeard docht, moat wol witte
dat straf perfoarst him treffe sil,
want God joech ’t swurd grif oan de oerheid,
dy’t troch Him ynsteld is…
belêsting moatst ek net ferjitte.
Brief fan in Romein oan Paulus
Bêste Paulus, no moatst hearre:
de oerheid straft ús om ’e nocht
yn de arena foar de liuwen,
lykas dat ynsteld is…
wy moatte foar de oerheid stjerre.
* Yllustraasje ‘Kristenen foar de liuwen goaid’