juli 12, 2019
fan ûnbekend*
Fan Paulus, troch de wil fan God
apostel fan ús Jezus Kristus,
oan jim dy’t leauwe, folk
fan God genede en ek frede,
yn syn hannen is ús lot.
Us lot komt streekrjocht út syn plan
mei Jezus Kristus, de ferlosser
fan elkenien dy’t leaut,
it plan om troch him gear te foegjen,
dêr sprekt syn genede fan.
No ha ik fan jim leauwen heard
en ek dat jim fan minsken hâlde
dy’t hearre by Gods folk,
ik hâld net op om tank te bringen
foar jim stribjen op dit mêd.
Oan Kristus joech God krêft en macht,
Hy sit yn himelske kontreien
heech boppe ierdsk bewâld;
de tsjerke is syn lichem wurden,
Hy is ’t haad en hâldt de wacht.
* Mozayk ‘Paulus’
juli 10, 2019
fan ûnbekend*
De wrâld ken beide: goed en kwea,
jim binne minsken fan de Geast
en troch syn wurking goed fan aard;
wa’t ûnderweis in misstap docht,
bring him sêftsinnich wer op paad.
De eigenwize stiet foar gek,
mist kennis fan syn eigen geast;
ferlykje dy net mei in oar,
hâld do it by dyn eigen ljocht,
dat draachsto sels, it ljochtet foar.
Wa’t sieddet fan ’t ferkearde aard,
sil rispje grif syn ûndergong;
de Geast jout sie dat fruchten skinkt,
wa’t dêrfan sieddet, sjocht no al
dat oan de ein it libben winkt.
* Foto ‘Klear foar in goede rispinge’