april 16, 2022
fan ûnbekend*
Jeremia
It hiele lân moat it no witte,
dêrom rop it elkenien hjoed ta:
‘It boazet oan as wie ’t in stoarm,
de fijân is al ûnderweis,
dus slaan alarm!’
Jeruzalem moat soks ek witte,
dêrom kundigje it Sion oan
dat wat it docht, is net de noarm;
de fijân is al ûnderweis,
dus slaan alarm!
De liuw is út syn skûlplak kommen,
wa’t it folk fermoardet, komt deroan,
feroaret hiel it lân fan foarm,
’t wurdt mei de tiid ta wyldernis,
dus slaan alarm!
Hy sil de stêd ferrinnewearje,
dat gjin minske hâldt dêr dan noch ta,
doch dêrom no al rouklean oan
en klei en gûl dyn soargen út,
it is bedoarn!
* Foto ‘Oanfallende liuw’
april 13, 2022
fan ûnbekend*
Jeremia
Dit wurd sprek Ik foar Israel:
‘Asto by My weromkomst,
de ôfgodsbylden foar myn eagen
fuortdochst en net langer swalkest
fan it iene nei it oare plak,
nei wierheid by myn libben swarst,
dan krigest fan de folken dyn gerak,
har wurd fan lok komt op dy del.’
Foar Juda sprek Ik ek in wurd:
‘Wolsto by My wer komme,
dan moatst it wyldlân foar myn eagen
ploegje, djip genôch foar ’t siedzjen,
dat de stikels reitsje fan har plak;
besnij jim dêrnei foar de Hear,
jim hert stiet iepen, jout Him ûnderdak,
oars wurdt de brân fan grime grut.’
* Kaartsje ‘Israel en Juda’