Posted by admin

It hat wat fan in kapperssaak,
wol fier werom yn de histoarje,
’t moast mar koart, sa wie har wins,
doe koe de kapper krekt syn taak,
har oansjen moast feroarje.

’t Wie wol wat revolúsjonêr
hoe’t Frânske knippers ’t koarter diene,
’t libben wie hast by de grins,
Elisabeth wist hoe en wêr
en wa’t foar har ek giene.

De frou foar har hie ’t hier pikswart,
yn ’t needlot wie it har freondinne
dy’t al gie, wylst sy hie lins,
omdat har hier wie noch net koart
genôch om al dêrhinne.

Sy seach dy’t wachten efkes oan
en liet noch ’t wite oansjen skine,
mar gjinien fan har wie prins;
ien tûfe noch dan foel har kroan,
foar har de guillotine.

* Charles Rochussen (1814-1894) syn keunstwurk hjit
‘Madama Elisabeth fan Frankryk yn de konzjerzjery,
10 maaie 1794’.
Elisabeth wie de suster fan kening Lodewijk XVI.

It waar is rûch, de see stiet hol,
it rikket wyn en ’t liket need
troch reek dy’t oer de weagen wynderet;
de trije boaten sitte fol,
mar binne ’t rêders by de fleet?

De Ruyter hat as admiraal
Pitsjaring seind, foar ’t sjitten rie,
sjoch hoe’t de wite flagge wapperet;
it is foar kapiteins de taal
fan ’t wurd foar ’t kommen ta de die.

De skilder rôp himsels ta rie
by’t skôgjen fan syn wyt paniel,
seach foar him hoe’t de boaten skommelen,
kaam mei syn roeiriem ta de die
en naam sa oan Pitsjaring diel.

* W.J.J. Nuijen (1813-1839) makke reizen
by de kust lâns oant Normandië ta.
Pitsjaring is ôflaat fan it Maleiske wurd
‘bitjara’, dat oerlizze of rieplachtsje betsjut.
‘Op wei nei it admiraalskip’ is skildere
op in panieltsje fan 32,5 x 39 cm.