It masker kwyt

fan Fernand Khnopff*

Sjedêr myn suster Marguerite,
foar my mystearje as model,
sy joech har by it masker del,
dy twa sjoch ik as favoryt.

Refleksje hat sy op it each,
dat nei it bleke masker sjocht,
sy fielt him oan, wat hy al tocht,
dy beide driuwe op ien weach.

Hy seit itselde as har lea
fertelle oer wat komme sil,
de mûlen hâlde har deastil
en ha gjin sin oan ’t deistich brea.

Sjedêr it hieljend hospitaal,
de mûle iepen, sa’t it heart,
refleksje fan de mins dy’t stjert…
fertelde ’t masker dat ferhaal?

Myn leave suster Marguerite,
’t mystearje is no ienkear rûn,
in minske is it leafste sûn…
do rekkest hjoed dyn masker kwyt.

* Fernand Khnopff (1858-1921)
Tekeningen ‘Secret-Reflet’