Kuommunikaasje

admin

september 24, 2016

Kuommunikaasje

Se stekke der noch altyd boppe-út,
de tuorren om it boadskip oer te bringen,
de psalmen foar de preek,
it lofliet nei ’t gebed
om muoisum troch te kringen
mei ’t lieden fan de klok
berikt it boppe net
en ûnder hat de leek
yn godferlitten streken gjin ferlet.

Se stekke slank en spits de hichte yn,
de mêsten om safolle ierdske netten
te foljen mei de fisk,
miljoenen tagelyk,
sa maklik neffens wetten
mei flits nei satellyt,
hiel blits yn ien kear ryk
en ûnder krijt de leek
godigitaal fan boppen de technyk.