Sa’t wetter spegelet bosk en boat,
sa spegelet dizze boat de mienskip
fan Frânsen yn de skildersfloat
dy’t koersten op ympresjes.

It wie Monet syn atelier,
ûntwurpen troch freon Caillebotte,
’t waard al gau it ynspiraasjestee
fan skilders mei ympresjes.

Monet, Manet en ek Renoir
trochlibben op dit stielen kasko
yn de houten roef by alle waar
de djipte fan ympresjes.

As spegels heinden se it oard
mei om har hinne kleare kleuren,
loeken spoaren – baren fan de boat –
op doeken, har ekspresje.

Gjin spegel heint de Wâldfeart op
as inkeld it prozaysk tastel;
blau stiet as ympresje oan de top,
wêr bliuwt no de ekspresje?

* In skilderij fan Claude Monet (1840-1926) hat
de oanlieding west ta de term ‘Ympresjonisme’.
Dy namme wie earst in skeldwurd, mar waard letter
de oantsjutting fan in streaming yn de Frânske
skilderkeunst.