Winnend Grienlân

fan ûnbekend*

It lân is wyt fan suver libben,
tagelyk ek grien fan hoop
op frijheid neffens eigen aard
mei de iisbear as idoal
yn in sfearfol kâld klimaat.

In lân dat stadichoan brún kleuret,
tint fan earder de fassist,
dy’t frijheid faget fan de kaart;
Brún de Bear as it idoal
keart syn kont tsjin it klimaat.

De bear stekt út syn skerpe klauwen
nei it lân fan griene hoop,
ferwachtet fan syn oanfal baat,
wurdt sa ta in iisbear-boal,
gleon is oeral it klimaat.

Oerein, jim dieren fan de ierde,
mei elkoar foar suver wyt!
Stjit Brún de Bear fan ’t winnend iis.
Nea komt hy wer yn syn hoal,
is ynferzen troch ’t klimaat.

Yllustraasje ‘Grienlân’