januari 23, 2017
Kin foar himsels de moarntiid sprekke,
de wredens fan de grauwe winterwrâld,
dy’t roetkâld priket yn de hûd?
Hy sil it eachweid iepenbrekke.
It lûd komt út ’e fierste fierte,
dêr’t yn de dize leit de Snitser mar,
de froast bestjurre al it far,
wat klomske fûgels witte litte.
Mar harkje dêrnei nei de barsten,
dy’t mannichfâldich skuorre yn it iis,
de moarntiid sprekt fan lang net wiis,
it tempo is mei trije hasten.
Sjedêr de peallen foar de touwen,
dy’t grutte skippen hâlde oan de wâl
en steane foar de iisgroei noed,
de hannen bliuwe yn de mouwen.
januari 22, 2017
fan ûnbekend*
fan ûnbekend**
Se sieten op deselde fyts
en trapen ritmysk op en del,
de protestant en katolyk,
de kant út fan bysûnder ûnderwiis.
‘Jou jild en frijheid,’ wie de yell,
‘dan binne wy oan iepenbier gelyk!’
De liberaal fûn soks in griis.
In oanslach op it kapitaal
en op ’e ienheid fan de steat,
betocht de frije liberaal,
se fytse streekrjocht nei luilekkerlân,
foar ’t ryk is ’t op ’e kop ferkeard,
se geane mei de frijheid oan de haal,
doch rap in oanslach op ’e bân.
De tandem kriich gjin lekke bân,
de dûmny en mynhear pastoar,
sy trapen lekker ritmysk troch
de kant út fan bysûnder ûnderwiis
oant berntsjes songen bliid yn koar:
‘Us roomske skoalle kaam der net omdoch,
mar dochs juf non is âld en griis.’
* Spotprint ‘De tandem yn de polityk’
** Foto fan in roomsk-katolike (beuker)klasse