januari 7, 2017
fan ûnbekend*
Fiif soannen hie Mattatias:
Jehannes, ek wol Gaddy neamd,
Simon mei de namme Tassis,
Judas Makkabeeër,
Eléazar neamden se ek Avaran
en Jonatan dy’t ek wol Affus hiet.
Fiif soannen kamen yn ferset
tsjin ’t goare heidendom,
sy holden har oan Mozes’ wet,
behellen foar de Joaden rom.
De fijân brocht de soannen om,
earst fjouwer yn de striid,
wat rjocht wie, bûgde dêrmei krom,
allinnich Simon kriich noch tiid.
Hy boude earst in monumint
foar heit en mem en broers,
sa bleauwen deaden noch bekend,
foar Simon wie it rjocht de koers.
Ferried sloech ta, hy rekke dea
as lêste fan it skaai,
de tiding rûn troch hiel it gea:
de Makkabeeërs binne wei.
* Ofbylding ‘Simon de Makkabeeër’
januari 6, 2017
Ut it skûtsje-argyf 2004
It wiene start en wyn yn kombinaasje
dy’t besleaten oer de oarder by Langwar,
de skipper hie net folle kar:
de ien kriich faasje, mar in oar de argewaasje.
Mei wyn fansiden gie de float foar wûnder,
alle skûtsjes rûnen like hurd, gjin kar
om foar te kommen op ’e mar
mei droechten, inkeld foar it sicht wie it bysûnder.
De moaiste start wie foar de Heale Moanne,
dy’t frij sylde mei de wyn as bêste maat,
de skipper foel net yn it skaad,
syn plasse skynde heal as soe it derom spanne.
It wiene start en wyn yn kombinaasje
dy’t besleaten foar it skûtsje fan Langwar,
foar ’t wedstriiddoarp wie ’t yn de war:
plak fjirtjin wie te tsjuster foar de eigen naasje.