Optillend byld

fan Martin Johnson Heade*

De kamera leit bylden fêst
fan ’t lânskip wêr op ierde ek,
sa wurdt de werklikheid werjûn;
it skilderseach heint bylden op
fan ’t lânskip sûnder fêst te lizzen,
mar set geast en hân oan ’t wurk,
fêst hat sa’n byld wat mear te sizzen.

Lit Johnson Heade syn gong mar gean,
hy klimt net by de bergen op,
mar hat it each op ’t plattelân,
de greiden oan de eastkust fan
Amearika, dy’t iepen lizze
foar it each, safier’t dat rikt,
hy lit syn byld syn wierheid sizze:

Sjoch hoe’t de himel en it fjild
harmoniearje troch it ljocht,
dat mei syn strielen ’t fjild optilt.

* Martin Johnson Heade (1819-1904)
Skilderij ‘Newburyport Meadows’