augustus 31, 2020
Wa kloppet by it stedhûs oan
oars as om ’t ien of oar bewiis?
It hat te krijen mei identiteit
om te bewizen wa’t men is,
wat alles oer de mienskip seit.
Sy kloppet sittend op ’e doar,
gjin kwestje fan in handicap,
mar sa te sjen fan har identiteit,
fol fjoer slacht sy net ien kear mis,
wat alles oer har keunstwurk seit.
Har klopjen is in hiele keunst,
slút by it iuwenâlde oan,
sy sit op it moderne ‘fjoer.nl’,
dy kombinaasje kloppet wis;
op slach leit sy de hammer del…
… as ’t keunstwurk nei har wêzen is.
augustus 30, 2020
fan ûnbekend*
fan Hermann Rorschach**
As jonge kriich er al in namme
dy’t ferwiisde nei syn test:
‘Hé, Hermann inketflek!’
Rorschach junior fûn ’t bêst,
hat him dêrfoar net skamme.
As psychiater liet er witte
dat de inketflek koe mear
fertelle as de crash:
inket grieme op papier…
hoe soe ’t mei minsken sitte?
De minske moast spontaan fertelle
wat er yn de flek krekt seach;
sa kaam de siele bleat
foar it ljocht, alhiel gjin sier…
wat jildt, streamt út ’e welle.
De fantasy kin streame litte,
mar de siele leit hiel djip
ferburgen yn it kleed
fan ’t foldocht my hjir wol bêst…
hoe kin men dan mear witte?
* Foto ‘Hermann Rorschach (1884-1922)
** Plaat út ’e Rorschach-test
