september 12, 2020
fan ûnbekend*
De ingel sprekt:
God de Hear besielet de profeten
troch syn ingel, dy’t er útstjoerd hat
om sjen te litten wat gau bart.
Kristus sprekt:
Ja, ’t is wier, Ik sil mei gauwens komme,
lokkich hy dy’t fêsthâldt oan it wurd
dat de profeten sprutsen ha.
Jehannes sprekt:
Ik, Jehannes, bin troch ’t wurd ferstomme
dat ik heard ha, tagelyk seach ik
wat wie foar ’t minske-each te grut.
De ingel sprekt:
Fal, do feint, foar my net op ’e knibbels,
want wy tsjinje beide God de Hear
en jouwe biddend Him de ear.
Kristus sprekt:
Ja, ’t is wier, jim moatte tsjinjend trochgean,
elk fertsjinnet nei syn wurk it lean,
jim lean dat Ik al by My ha.
Alfa en Omega is myn namme,
lokkich hy dy’t komt mei skjinne klean,
syn rjocht is op ’e libbensbeam.
Wa’t it kweade docht, moat bûten bliuwe,
foar myn boadskip ha ’k de ingel stjoerd,
as Moarnsstjer skitterje ’k foargoed.
* Yllustraasje ‘Kristus as Moarnsstjer’
september 11, 2020
fan Herbert James Draper*
Ut ’e moarnsstjer waard er berne,
wie al wekker foar it sinneljocht,
sadat syn dei lang duorre,
mar wat hat it deiljocht Keyx brocht?
Dochter wie sy fan Aiolos,
god fan wyn út alle hoeken wei,
har longen waarden fuorre
troch god-heit syn azem, nacht en dei.
Keyx moast op reis en farre
dei en nacht, dat Alkyone hie
gjin kalme oere, dreamde
dat har leave man ferdronken wie.
Alkyone gie nei ’t strân ta,
fûn ta har ferbjustering syn lyk,
begûn doe lûd te kleien,
waard in fûgel mei dat lûd allyk.
Goaden rôpen Keyx wer ta
libben, net as man fan nacht nei dei,
iisfûgel mocht er wurde,
op syn flecht naam hy syn leafste mei.
* Herbert James Draper (1863-1920)
Skilderij ‘Alkyone’
