augustus 25, 2024
fan ûnbekend*
fan ûnbekend**
Se binne deagien yn in wike,
trije lieders yn de kriich,
dy’t withoefolle ’t libben koste,
trije lieders wisten fan dy moard:
Benito Mussolini,
Adolf Hitler,
Franklin Roosevelt.
Dy wike telde trije liken:
Mussolini kriich in skot
en Roosevelt in harsenblieding,
Hitler regele syn eigen moard;
Benito Mussolini,
Adolf Hitler,
Franklin Roosevelt,
sy wisten fan ’t massale lot.
De wrâld wist lykwols fan gjin wiken,
jierren folgen mei de bou
fan ûnderkommens foar de riken,
wylst wa’t earm wie, fielde ’t as in moard;
Benito Mussolini,
Adolf Hitler,
Franklin Roosevelt.
sy wisten fan massale rou,
’t ferskil: twa wiene mei de moard akkoart.
* Foto ‘Benito Mussolini
** Foto ‘Adolf Hitler’
augustus 24, 2024
fan ûnbekend*
Daniël
Kening Darius koe yn dy nacht
net ite, ek de sliep net krije,
hie fan ferdivedaasje gjin
ferlet, ier-en-betiid gie hy fan
bêd, hie neat mear mei syn priel en pracht.
By de liuwekûle rôp er lûd
mei drôvich lûd: ‘Bist noch yn libben,
do tsjinstfeint fan de heechste God,
dysto altyd stânfêst ferearest?’
Bûgend oer it gat seach hy gjin bloed.
Ut ’e kûle wei klonk ek in lûd:
‘O kening, libje foar altiten,
God hat foar my in ingel stjoerd,
dy hat de liuwebekken sletten,
dat ik libje noch, mei my is ’t goed.’
* Yllustraasje ‘In ingel yn de liuwekûle’