juli 25, 2021
fan ûnbekend*
fan ûnbekend**
In dûbellibben hjir en dêr,
tichtby de grûn en yn de flecht,
yn frijheid en totalitêr,
it moast foar Charles wol kinne.
De oseaan hold him net tsjin,
sa kaam er fleanend nei Parys,
it wie de Steaten nei it sin,
mei him as held wie rom te winnen.
Hy waard de loftfeartpionier,
ferbettere de fleantechnyk,
de naasje makke gjin beswier
en liet syn hichtemotor rinne.
De Steaten wiene op ien ein
doe’t lytse Charles fermoarde waard,
dêroer is ’t lêste wurd net sein,
soe heit de dieder wêze kinne?
It rûn ferkeard yn Dútslân ôf
doe’t hy dêr dekorearre waard,
’t rasisme brocht him yn it nau,
de naasje liet de held allinne.
In dûbellibben hjir en dêr,
mear froulju joegen him ek bern,
foar har wie hy de loftfeartstjer…
totale frijheid moast dochs kinne?
* Foto ‘Charles Lindbergh’
** Foto ‘Spirit of St. Louis’
juli 24, 2021
fan ûnbekend*
Jesaja
Ik sprek, dus lit de folken swije,
lannen oan de seekant, hâld jim stil
en wachtsje oant ik kom mei myn bewiis,
gjin godsbyld sil de eare krije.
Sis My ris… Wa hat út it easten
roppen him dy’t al gau komme sil,
de kening foar de keningen in griis?
Hy wint de striid en wurdt de earste.
Wa jout him yn de macht de lannen
oan de see? ’t Bart inkeld troch myn wil
dat hy mei ’t swurd de keningen fergriemt,
hy kriget alle macht yn hannen.
Soe Ik my net as God bewize
boppe ’t godsbyld fan de edelsmid,
’t byld dat mei tal fan spikers fêstset wurdt?
Ik sil dy kening wegen wize.
* Byld ‘Kening Cyrus’
