augustus 2, 2021
Mei iepen earen nei de wrâld,
sa krûpt de kwartel út ’e dop,
benijd nei wat it libben bringe sil…
wa hat it oer in dove kwartel
as in nij begjin sprekt op?
Foar achttjin kleuret read de wrâld
fan waarmte, wetter, fjoer en mei
elkoar de romte diele, want it tilt
op fan beweging oeral hinne,
elke kwartel giet syn wei.
Dy wei bliuwt yn de lytse wrâld
beheind ta wat in rommer hok:
kultuer jout dizze kwartels net de wil
om folle fierder te ferkennen
as it hok… beheind gelok?
augustus 1, 2021
fan ûnbekend*
In plan wiist nei de takomst ta
om troch te wurkjen nei in ideaal:
safolle yn in koarte tiid,
it giet op ’t lêst om kwantiteit,
it grutte kapitaal.
It kaam fan Stalin, hy woe ha
dat lytse boeren yn it grut
mear leveren yn koarte tiid,
it gie net mear fan heit op soan,
de wet hie ’t lêste wurd.
It moast net lykas ’t wie, mar sa:
de lytse boer yn it fabryk,
gjin útsicht mear op wiid en siid,
it kaam sa op produksje oan,
oan ’t ideaal gelyk.
Gjin minske is der mar op ta,
elk libbet mei syn eigen lyts ferhaal,
dat hy fertelt, elk op syn tiid,
it giet op ’t lêst om kwaliteit,
in heger ideaal.
* Foto ‘Mei Stalin’