september 8, 2024
fan ûnbekend*
fan ûnbekend**
Hiroshima, Nagasaki,
Little Boy en de Fat Man,
lyts wie it swiere jonkje net,
de tsjokke man hie wol in namme
dy’t neier by de wierheid kaam,
mar fielde men him wol beskamme?
Yn in oarloch wurdt net skamme
troch mynhear de presidint
en ek net troch de generaal,
har strategy om út te fieren
wat is yn ’t nasjonaal belang
giet boppe alles, is de wiere.
Boppe hûnderttûzen libbens,
dy’t mei ien klap waarden wei,
fan little boy oant de fat man
mei mar in deagewoane namme,
dy’t nea de wierheid witten ha…
noch freegje sy: ‘Wêrom dy flammen?’
* Foto ‘Atoombom op Hiroshima’
** Foto ‘Nei de atoombom’
september 7, 2024
fan ûnbekend*
Daniël
Daniël seach him by ’t wetter stean
en tagelyk wie dêr in raam
mei op ’e kop twa hoarnen,
dêr’t er mei begûn te ramen
oant gjin bist mear op ’e poaten stie,
hy koe foarearst syn gong mar gean.
Ut it westen kaam in geitebok
mei op ’e kop in lange hoarn
dêr’t hy de raam mei stjitte
oant dat bist net langer rame
koe, want beide hoarnen wie hy kwyt,
hy moast werom yn ’t eigen hok.
Mar de geitebok kaam ek yn noed,
syn iene hoarn briek fan de kop,
dêr’t fjouwer oare kamen,
ien dêrfan begûn te ramen,
stjitte út ’e loft wei mannich stjer,
ûnthold de Himelfoarst de groet.
* Yllustraasje ‘Fisioen fan raam en bok’