april 22, 2022
fan ûnbekend*
Hy waard net trochslokt troch syn heit,
lykas fiif oare bern fan Kronos,
want de mem ferburch har soan,
dy’t grutbrocht waard troch nimfen,
holpen troch de molke fan in geit.
As jonge briek er ôf in hoarn
as teken fan in striidber libben,
dronken fan it goademiel
mei ambrozyn en nektar,
hoarn fan oerfloed foar de goadesoan.
Heech op Olympos stie syn troan,
dêrwei seach Zeus de hiele ierde
oer mei yn de hân in pylk
dy’t flitste as de bliksem,
dêrmei rekke hy it minskdom oan.
As haadgod keas hy froulju út
yn wa’t er ’t sied oerfloedich struide,
wat brocht mei in leger bern
op ierde en Olympos…
Zeus seach ’t oan, ’t wie neffens syn beslút.
Byld ‘Zeus’
april 21, 2022
fan Willard Metcalf*
fan ûnbekend**
Sy stiet as stânbyld foar it hûs,
al jierren lang har stânplak,
ek in feilich ûnderkommen,
folle âlder as sysels,
’t hat har folslein opnommen.
Sy hat gjin sinten by de rûs
om ’t ûnderkommen op te
knappen, dochs is sy tefreden
mei dat sy it sparre hat
yn har bestean fan frede.
Sy rint rap by har wenning wei,
dêrmei hie sy it troffen,
mar hjoed troffen troch de bommen,
dy’t har rekken yn it moed,
wei is har ûnderkommen.
* Willard Metcalf (1858-1925)
Skilderij ‘Aldste hûs’
** Foto ‘Marioepol’
