april 28, 2022
fan Hjeronimus Bosch*
Wa leaut der no noch yn de hel
as ’t ierdske libben, swier fan kwea,
foargoed de ein berikt hat,
mar is dêrmei de hel ek dea?
Sjoch hoe’t de hel wie noch yn tel
de iuwen troch as ’t deistich brea,
dat deabenaud wie ’t minskdom
foar ’t slim kastijen fan de lea.
It gie earst by de hichte del,
de geast joech dêrby steun noch stjoer,
moast him oan satan oerjaan,
it lichem rekke yn it fjoer.
It leauwe yn de hel is oer
as men de echte bylden sjocht,
net leaut yn nep-berjochten…
de hel op ierde, nea oan tocht?
It Kremlin is it haadkertier
fan Lúsjefer dy’t folgers stjoert
om ûnskuld te kastijen,
syn fjoer ferskroeit geduerich bloed.
* Hjeronimus Bosch (sirka 1450-1516)
Skilderij ‘De hel’
april 27, 2022
fan ûnbekend*
Jeremia
Ik bin oerstjoer fan wat ik hear:
gesketter fan de hoarn, de kriichsrop
dy’t oer berch en flakte klinkt;
myn yngewanden krimpe,
’t hert lit witte dat ik stjer.
Ik bin oerstjoer fan wat ik sjoch:
de tinten geane tsjin de flakte
en oan flarden slacht it kleed,
heech rikt de oarlochsflagge,
dat wat jout myn roppen noch?
Ik ha myn bêst dien as profeet,
mar ’t folk woe net nei ’t boadskip hearre,
yn it kweadwaan is ’t betûft,
it wol de Hear net kenne,
dêrom is it folk yn need.
* Foto ‘Tintekamp’