mei 6, 2022
fan ûnbekend*
Sjedêr kaap Kaliakra,
fiergeand yn de Swarte See,
de kaap dy’t mei syn namme
ear bringt oan ien fan de fammen
dy’t it weagen fan de hichte ôf.
It wiene Ottomanen
dy’t feroveren dat stee
en sleaten fjirtich fammen
yn in grot, de kreaste flammen
fan it gea, sy kamen yn it nau.
It wie doe Kaliakra
dy’t betocht in fiergeand plan:
de iene bûn de hierren
oan dy fan de oare, stjerre
soene sy, ’t gie fan de hichte ôf.
Sjedêr de Ottomanen,
troch de fammen yn de ban,
sy seagen oan fan fierren
dat de fjirtich fammen leaver
stoaren as te wurden harren frou.
* Foto ‘Kaap Kaliakra’
mei 5, 2022
fan Jean-Léon Gérôme*
Se fleane fûgelfrij,
de dowen fan it plein,
dy’t wjukje yn in flecht
mei yntuysje sûnder ein.
De ein is derfan wei,
se fleane ôf en oan,
de wjukken klappe foar
de hiele harem mei fertoan.
Se litte harren sjen,
as froulju fan komsa,
dy’t wer nei bûten gean,
om ’t sy in swak foar fûgels ha.
Se struie mei it hert
har goederjouskens út,
benije soms de flecht
foar’t achter har de doar wer slút.
Sy binne fûgelfrij
wannear’t it tsjuster is
en hy kiest ien derút,
syn inkeld skot is altyd wis.
* Jean-Léon Gérôme (1824-1904)
Skilderij ‘Harem-froulju fuorje dowen’