juli 9, 2024
fan ûnbekend*
Daniël
Unbidich wie it gouden byld
dat nei de dream ferriisde
yn de delling fan Dûra;
oeral wei rôp doe de foarst
de pommeranten fan syn ryk,
wat op in feestlik barren wiisde.
Omroppen waard út alle macht
dat folken út ’e naasjes
yn de hiele wrâld har falle
litte moasten foar it byld
by ’t klinken fan de hoarn, skalmei
en oar spylark, want út ’e graasje…
… wie elkenien dy’t rjocht oerein
bleau, dus de foarst gjin eare
joech, sy waarden yn de flammen
wijd, ta jiske waard de lea.
Doe klonken hoarn, skalmei en oar
spylark: ‘Ear oan de foarst as Heare!’
* Yllustraasje ‘Nebûkadnessars gouden byld’
juli 8, 2024
fan ûnbekend*
Daniël
Nei de dream sels kaam de útlis,
dêr’t de kening mei in glimk nei harke,
want hy wie de gouden holle,
God hie him dat heechste foarrjocht jûn.
Dêrnei kaam in ryk fan sulver,
minder glânzjend as dat fan de kening,
dat fan koper glom noch folle
minder, hearske wol oer hiel de wrâld.
Nei it koper folge ’t ryk fan
izer, dat de hiele wrâld oan splinters
sloech… wa soe dan libje wolle?
Ek dat fjirde ryk rûn nei de ein.
Hurd sil ’t fiifde ryk ek wêze,
mar de klaai fan pottebakkers makket
izer swakker, de útholle
macht hâldt op it lêst grif ek net stân.
Nei fiif keninkriken komt it
keninkryk fan God, de stien dy’t alle
oare riken – izer, gouden
holle, koper, sulver, klaai – ferslacht.
Yllustraasje ‘It byld en de keninkriken’