september 29, 2022
fan George Grosz*
Lang libje sil de maatskippij
dy’t steunt op pylders fan de macht:
aristokraat, nasjonalist,
sosjale demokraat en pryster,
dus sljocht folk: ‘Jou acht!’
Sjoch him mei ’t bierglês yn de hân,
de holle fol mei kriichsgeweld,
dêrnjonken de nasjonalist
mei omkeard op ’e kop de pispot,
dus sljocht folk: ‘Macht telt!’
Sjedêr de wiere demokraat
mei ’t flachje foar syn flink pamflet
mei wurden opgeand yn de mist,
lykas de seine fan de pryster,
dus sljocht folk: ‘Te let!’
Hearst dêr al stampen de soldaat
en sjochst it lôgjen fan it fjoer
foar ’t sljochte folk dat oars net wist
as dat de machtigen ’t wol wisten,
foar harren is it oer.
* George Grosz (1893-1959)
Skilderij ‘De steunpylders fan de maatskippij’
september 28, 2022
fan ûnbekend*
Jeremia
De pottebakker liet my sjen
wat hy die mei in pot
dy’t neffens him mislearre wie:
de pot kaam net teplak,
de klaai gie lykwols net ferlern,
in oare pot kaam dêrút fuort.
De Hear ferklearre wat ik seach:
‘It folk is as de klaai
dy’t hjoed de dei mislearre is
as pot, krijt dus gjin plak,
komt op ’e nij foar ’t each
wannear’t it folk it goede docht.’
Mar ’t folk as klaai feroare net,
it gie syn eigen gong,
mislearre foar it each as pot,
kriich fan de Hear gjin plak
troch syn ferhurde hert…
de pottebakker hie syn nocht.
* Foto ‘Pottebakke’