augustus 22, 2024
fan Thomas Gainsborough*
De blêden rûzje op ’e wyn,
wylst Tom de hûn de frijheid hat
om earst te drinken, dan te draven
op ’e siik nei wat nijsgjirrich is:
in kikkert, mol of knyn.
Sy sitte, steane stiif yn klean
dy’t gaadlik binne foar ’t portret
en troch de moade foarskreaun wurde;
heit syn skilderstyl is neat mis mei,
sy moatte dêrfoar gean.
Mar leaver gean sy as de hûn
op ûndersyk nei wat har boeit:
de flinters dy’t yn frijheid fleane
op ’e siik nei kleuren, blom nei blom,
net oan de moade bûn.
* Thomas Gainsborough (1727-1788)
Skilderij ‘De húshâlding fan de keunstner’
Skilderij ‘De dochters fan de skilder
fange in flinter’
augustus 21, 2024
fan Peter Paul Rubens*
Daniël
Deis bea Daniël wol trije kear
mei lof oan God en mei syn fragen
dy’t giene oer Jeruzalem,
wat tsjin de wet wie dy’t de kening
útskreaun hie ta eigen macht en ear.
Doe’t de hege hearen yn it ryk
him op ’e knibbels lizzen seagen,
ferklapten sy dit oan de foarst,
dy’t war die Daniël te rêden,
mar foar him wie lykwols gjin ûntwyk.
Daniël waard nei de kûle brocht
dêr’t liuwen ’t foar it sizzen hiene,
in stien kaam op ’e iepening
mei segels fan de kening en de
pommeranten, wei waard alle ljocht.
* Peter Paul Rubens (1577-1640)
Skilderij ‘Daniël yn de liuwekûle’