De sêge kaam foar eagen
fan him dy’t sân pear earen hie:
de rykdom en de pleagen,
wat kostber wie, waard nea wer sie,
mar hy beseach it mei syn eagen:
it aventoer as heechste ideaal.

Sy stiene doe yn Starum
tegearre yn in nij ferhaal
en stoarren oer de weagen,
wylst dreamend op ferlytse skaal
en wat sy yn de fierte seagen…
in dûbelgrut geheim yn byldetaal.

Wylst ljocht de omkant tekenet
fan seil en fok heech oan de mêst
op skûtsje en op klipper,
fyts ik fertiisd en sûnder rêst
yn tinzen nei syn wente,
dêr’t heit no yn de kiste leit,
syn skûtsje sûnder hichte
fan mêst en ljochtsjend túch, mar ’t seit
my mei dat iene tichte
en lakte lûk jûn folle mear
as tuorrehege klippers…

… dêr leit er ûnder glês en seil,
syn byld as silend skipper
fersonken ta it lege peil
fan ivich stilsteand wetter,
in spegel foar de lêste kear
mei twa gesichten, better
ferliking jout gjin inkeld glês,
want heit en bern, yn libben
en yn de djipte fan de rêst,
sy bliuwe heech besibbe.