Al trije kear gjin kampioen,
’t wie skipper Tjitte net nei ’t sin,
want lei it oan himsels of kaam it
om’t it skûtsje minder rûn,
hy sliepte troch dy twivel min.

De dream joech ’t skip in nije mêst,
wêr wei, dat wie de hege fraach,
gjin Frysk produkt, mar ‘made in Holland’,
want fierôf foldie it bêst,
se limen fleurich laach op laach.

De lange fracht kaam feilich oan
en wipte op it skip omheech
om op ‘e mar syn krêft te testen,
dêr’t er song op falske toan:
in knap, doe moast er wer omleech.

’t Ferstân fertelde hoe’t it lei
oan ‘made in Holland’ laach op laach
mei wol de lym, mar gjin ferhurder;
hurde Friezen litte mei
gjin lym har plakke yn de kraach.

* Tjitte Brouwer fan It Hearrenfean

Frjentsjer, âlde stêd, mar sûnder mar,
ek sûnder skûtsje yn de striid,
wat jout dyn universiteitsferline?
Gjin professor smarde fet of tar
of sylde yn syn frije tiid.

Gjin professor wied er, mar rebel,
de nûmer fyftjin yn de striid
foar Frjentsjer, sa woe skipper Gerrit Roosjen,
lykwols fjirtjin wiene mar yn tel,
want ’t wetter eage net te wiid.

Wizer wie de fisy fan dy fint
fan oan de slach en net in les
fan professoaren mei har analyzes;
tolve reagearren op syn hint:
lang libje de IFKS!

Foto’s út ‘Offciële uitgave van de IFKS 1983’