It dreambyld rekke yn de dize,
mar de machtsglâns ljochte op,
de kening stiek heechop it krop,
der moast in gouden stânbyld rize.

It waard in byld fan tsien kear heger
as de langte fan de foarst,
út ien stik, sûnder naad of barst,
gjin goudwurk wie yn Babel dreger.

’t Befel wie om massaal te fieren
dat de kening strieljend stie
op ’t fuotstik, dus net ûnder die
foar goaden, ’t folk wie as de dieren.

Tichtby de grûn, de holle bûge
by muzyk fan ’t feestorkest,
mar wa’t oereinbleau, hie der west,
hy waard troch hjitte flammen noege.

It byld seach del op mannich holle
as lei ’t folk ferslein op ’t plein,
mar trije bleauwen rjocht oerein,
want kenings wurd wie har tefolle.

* Ut ‘Understanding prophecy’
Yllustraasje ‘It byld fan Nebûkadnessar’

It byld stie elkenien foar eagen,
mar wat it sizze woe noch net,
dat soe troch ’t wurd fan Daniël;
hy hat de foarst en ek de wizen ret,
dy’t him as harren rêder seagen.

De Iene jout de kening gloarje,
fan ’t byld de holle, suver goud,
fan sulver is it twadde ryk,
fan minder oansjen, dat ek leger bout,
sels koper kin noch wol bekoarje.

Feroaring komt mei ’t hurde izer,
in ryk dat alles stikken slacht,
mar ’t izer mongen mei de klaai
kin net mear stean, in kening sûnder macht,
it hiele byld is de ferliezer.

De Iene sil de wrâld feroarje
mei ’t keningskip dat ivich is
en hurde machten stikken slacht…
de bylddream en de útlis wiene wis,
oan God en Daniël de gloarje.

* Ofbylding ‘It dreambyld’