Ynienen wie it feestsjen oer,
want op ‘e muorre kaam beweging,
heimsinnich troch in frjemde hân dy’t skreau;
de kening rekke raar oerstjoer,
it wie de eangst dy’t him doe dreau.

De wizen kamen der net út,
’t moast komme fan de keninginne,
dy’t yn ’t ferline socht nei Daniël;
de kening waard doe resolút,
dat Daniël kaam daliks del.

Hy seach it skrift en doe werom
op kenings heit syn macht en heechmoed…
en delgong nei de ezels yn it fjild,
opdat de Iene krige rom,
dus hie de foarst him raar fertild.

Mené mené tekel ûfarsin:

‘God hat it keningskip hjoed teld,
it is te licht, sil dêrom brekke,
ferparte wurde oan de Pers syn ryk.’
Sa is de foarst de wierheid meld,
dyselde nacht waard hy ta lyk.

* Rembrandt (1606-1669)
Skilderij ‘Belsjassars feest’

De kening liet him ’t fierste gean,
it paad lâns nei Judea’s timpel
foar bekers, fetten, skalen en noch mear,
dy moasten op ‘e tafels stean,
want skomje soe it kear op kear.

Sa tjirre kening Belsjassar
him mei it hillich goud en sulver
en naam noch ien op ’t eigen goaderyk,
ynienen wie elk yn de war,
de tûzen waarden as in lyk…

* Vasily Surikov (1848-1916)
Skilderij ‘It feestmiel fan kening Belsjassar’