april 28, 2023
fan ûnbekend*
Pylders, heech oprizend
út ’e baai, fertelle gjin ferhaal
oer goaden dy’t it goed foar ha
mei minsken yn in frij bestean,
mar byldzje út om fan te grizen.
In draak dy’t út ’e hichte
delkaam, swaaide mei syn lange sturt
de kalkstien-bergen útinoar…
wat kin dan as gehiel bestean?
De frijheid sakket nei de lichte.
Vietnam, do lân fan ’t striden
ûnder machten wei foar in bestean
yn frijheid, bist no sels de draak
foar minsken, stribjend nei in frij
bestean, dyn sturt lit harren bliede.
Foto ‘Ha Long (draak dy’t nei ûnderen komt)
yn Vietnam’
april 27, 2023
fan ûnbekend*
fan Sjoerd de Vries**
Syn heit sit op it helmhout,
mar hy stiet as skipper oan it roer
om mei syn neisten troch de tiid te gean,
it hold oan board net oer.
Syn mem stiet op ’e lûken,
moast har rêde yn de lytse roef
om mei har neisten troch de tiid te gean,
it wurk oan board wie stûf.
Sjoerd hat oan board net wenne,
berne waard er yn in wente oan
de wâl om mei syn maten troch de tiid
te gean… as skipperssoan.
As keunstner liet er him al
kenne doe’t er noch op skoalle siet,
ferkocht oan maten wat er makke hie,
sa kaam er troch de tiid.
Syn âlders seach er foar him
as de skipper en de skippersfrou…
yn byld, mei him foar altyd troch de tiid,
hy bleau syn ôfkomst trou.
* Foto ‘Skûtsje De jonge Aaltje’
** Keunstwurk ‘Portret fan myn âlders’
